آغ فیل لره بنزر تپه لر

بیر سوزله دئسک چئویری، هنر و فن دئدیییمیز ایشلرین بیرلشمه سی دیر. ائله بو ایشین ان آغیر بولومو ده اونون هنرله اولدوغو ایلگی لری دیر و اونا گوره ده هر کس «چئویرن» یا خود اونون عربجه کلمه سینی ایشه آلساق، «مترجم» اولا بیلمیر. ایکی دیلین اینجه لیکلرینی دریندن دوشونوب و باشقا دیلده عینی متنین یارانماسینی ساغلاماق هر بیر دیل بیله نین ایشی دئییل. ائله اونا گوره ده اوزون ایللر بویو، سیسئرودان توتموش گونوموزه گلیب چاتان ماندئی ، حتیم، هولمزو باشقا تئوریسینلرین سایی آز اولماسادا آنجاق هامیسی ایکی ایده نین آرخاسیندا دالدالانمیشلار؛ «دویغو – دویغویا» چئویری یوخسا «کلمه – کلمه یه» می؟ یئنی تئوریلرده چئویری بیریمی (واحدی) کلمه می، جمله می یا خود متن می دئمک اوزون اوزون بحثلری باشلاتمیشدیر. آنجاق ادبی چئویریده یازیچینین گوردویو ایشی قوروماق و عینی حالدا اوخوجونو دا گوزه آلاراق باشقا بیر دنیادا یئنی و باشقا بیر متن دنیاسی یاراتماق چئویرینین هنر باخیمینی قاباریق شکلده اوزه چیخاریر.